Այսօր Սուրիոյ Մէջ Սկիզբ Առաւ Զինադադարը` Ատհայի Տօնին Առիթով.
Սուրիական բանակի սպայակոյտը յայտարարեց, որ Սուրիոյ բանակը այսօրուընէ մինչեւ երկուշաբթի
կը դադրեցնէ ռազմական գործողութիւնները, սակայն իրեն կը վերապահէ հակադարձելու իրաւունքը: Սուրիական
ազատ բանակի հրամանատար Ռիատ Ասաատ իր կարգին յայտարարեց, որ ազատ բանակի զինեալները
Ատհայի տօնին ընթացքին պիտի յարգեն զինադադարը: Ան նաեւ կոչ ուղղեց` բոլոր բանտարկեալները
այսօր ազատ արձակելու: Սակայն սուրիական զինեալ ընդդիմութեան «Անսար Շարիա» խմբակը յայտարարեց,
որ զինադադարը պիտի չյարգէ` աւելցնելով, որ կը կասկածի, թէ Սուրիոյ բանակը պիտի յարգէ
զայն: Թուրքիոյ վարչապետ Ռեճեփ Թայիփ Էրտողան երէկ Սուրիոյ կառավարութեան եւ ընդդիմութեան
կոչ ուղղեց` Ատհայի տօնին ընթացքին զինադադարը յարգելու: Ռուսիոյ արտաքին գործոց նախարար
Սերկէյ Լաւրով իր կարգին յայտնեց, որ Ռուսիա կը յուսայ, որ զինադադարը յարգուի` նշելով,
որ առանց նախապայմաններու երկխօսութիւնը Սուրիան տագնապէն նուազագոյն վնասներով դուրս
կը բերէ: Ռուսիոյ արտաքին գործոց փոխնախարար Կեննատի Կաթիլով սուրիական զինեալ ընդդիմութեան
կոչ ուղղեց` յարգելու զինադադարը: «Կարեւորը այն է, որ Սուրիոյ մէջ զինեալ ընդդիմութիւնը
զինադադարը յարգէ, ապա կարելի է զինադադարը քանի մը օրով երկարաձգել», նշեց Կեննատի Կաթիլով: